Класик-дистанцата од 30 километри започнува во комплексот Македонски село пред Етно музејот. Оттука се трча по асфалтниот пат покрај манастирот Св. Пантелејмон и низ село Горно Нерези. Веднаш после џамијата, од главниот пат се врти во лево по тесен асфалтиран пат стрмно нагоре меѓу куќите за да се искачува кон сртот на Водно и врвот Кале (Кота) (6.6км) следејќи комбинација од макадам и сингл-трек, тесна шумска патека. Од врвот Кале се спушта стрмно надолу во лево т.е. се продолжува кон Југ по јужниот гребен на планината до селото Св.Петка. 

На една полјана над селото Св.Петка, има раскрсница - се пролжува право - благо се спушта по една тесна тревна ливада до над селото каде што е првата освежителна станица (8.8км). Па благо се искачува во правец кон сртот и Крстот по макадам пат, угоре-удоле, кој на места се претвора во сингл со земја црвеница. Се стигнува на седлото (кај што беа багерите) и се искачува прво на врвчето па потоа се излегува на макадамот по гасоводот. Преку бункерите се префрла во лево на убавата шумска патека наречена Гунда.

На 15км има раскрница Гунда 1 каде што се врти нагоре во десно, за кратко се излегува на макадамот (гасоводот) на сртот - се префрла и се одвојува во лево во тесна сингл патека во правец на југ односно кон селото Соње. Се следи патеката и по неполн километар се скршнува во лево, за по неколку км да се спушти меѓу куќите до сред село Горно Соње каде што е втората освежителна станица (17.6км). Оттаму покрај репетиторот и низ иглолисна шума повторно се искачува по благо-стрмна и широка планинарска патека овојпат кон врвот Водно (Крстовар) (Милениумски крст).

На врвот не се оди преку домот туку по асфалтниот пат се продолжува па се крати после кривината кај војската па за стотина метра се одвојува во десно за шумската макадамска патека што води по сртот кон исток (во правец на Китка спротивно од Матка). Се трча по целиот срт па се спушта по Бабина патека до летниковците под Марково крувче каде што е третата освежителна станица (24.1км). Оттаму, по трим патека за два км се стигнува до Средно Водно и преку рампите се оди нагоре по асфалтат (кон врвот), но на нешто помалку од еден км од Средно се скршнува во лево и се искачува по МТБ патеката Чистилиште до летниковецот над Детскoто одморалиште. Се спушта по асфалтот покрај Детско и оттаму во лево се исклучува по планинарска патека која води до Бункери.

Патеката е сингл која минува покрај неколку огромни костени и благо искачува повторно до раскрсницата на патеката Гунда (каде што се вртеше од Бункери кон Соње). Тоа е на 29.8км па се врти во десно и надолу по сингл треил до целта во Македонски село. Се влегува од Горната капија (кај бачилото) и се врти еден полукруг низ комплексот за на крај да се финишира до ресторанот на плоштадот (31.6км).